Disclaimer: Pasensya  daan kung aduna kay makita nga wrong grammar ani nga blog post. First time ni nako nisuwat ug Binisaya. Nisulay ko karon ug sulat ani tungod kay na dasig ko ug binasa sa mga sinulat sa akong usa ka kauban nga blogger sa Cebu Blogging Community nga si Rome Nicolas. Bisitaha pud iyahang blog sa BastaBisaya.com.

Mutapos na ang tuig 2016. Sa hilabihan nako nga paghikabhikab, wala na nako nabantayan ang kakusog sa dagan sa panahon. Mura ug mao pa gani ang akong pag saulog sa akong adlawng natawhan, karon duha nalang ka bulan mu Pebrero napud.

Sa nilabay nga mga buwan, pipila pud ka mga destinasyon akoang nabisita. Mapasalamaton ko nga gitagaan ko ug kahigayunan nga maka bisita sa mga lugar sa Pilipinas nga gusto nako nga maadtuan. Sa tanang lugar nga akoang naadtuhan, aduna ko’y mga bag-ong nakat-unan nga dako kaayo ug na tabang  sa akong kinabuhi. Nanghinaot ko nga kini nga mga pagtulun-an, magpabilin sa akong alimpatakan ug mugiya sa mga desisyon nako ugma damlag.

Karong tuiga, aduna pud ko’y mga lisod nga desisyon nga gipili. Mga desisyon nga dugay nang ania na sa akong huna-huna pero sa akong kahadlok mo buhat, akoa nalang gisulayan ug kalimot. Apan usa sa akong nakat-unan karong tuiga kay ang dili magduha-duha ug tugyan kung asa ka dal-on aning lisod nga sayaw sa kinabuhi. Matud pa sa usa ka Amerikanang musikero nga si Trisha Yearwood, “What’s meant to be will always find a way.”

Lisod ang pagpili sa dalan nga wala ka nakahibaw asa ang padulngan. Karon, nakita na nako ang daghang posibilidad ug oportunidad, mga butang nga dili unta nako makit-an kung wala ko mubuhat sa unang lakang. Sa ingon pa nila, ang tanan nako nga mga damgo, anaa ra sa likod sa akong kahadlok.

Karong tuiga, ubay-ubay pud ang mga trahedya nga nasinati sa atong mga kaigsuonan hilabi na sa mga nagpuyo didto sa Kidapawan, Zamboanga City, ug uban pang mga lugar sa Mindanao nga hangtud karon, wala gihapon naundang ang kagubot. Naguol ko nag huna-huna nga malinawon ang akong pagpuyo diri sa Sugbo pero aduna diay mga nag antos sa ubang probinsya. Nanghinaot ko nga sa musunod nga katuigan, hinay-hinay nga makabangon ang tanang taw nga ga antos karon.

Usa pud sa highlight sa mga nahitabo nako karong tuiga ang pagkadawat nako ug recognition isip usa sa Top 10 Cebu Blogger Influencer for 2016 gikan sa Escooped Media. Wala ko nagdahom nga maapil ko aning listaha tungod kay upat ka buwan ko nga nipahulay sa pag-blog. Maulaw pud ko mutawag sa akoang kaugalingon nga usa ka ‘influencer’ kay pipila ra man pud kabook ang nag tamod aning akoang blog. Pero mapasalamaton gihapon ko kay tungod ani, nadasig  ko nga mupadayun ug ambit sa akong mga pamalandong sa kinabuhi.

Ug sa dili pa nako makalimtan, karong tuiga na himo pud diay ko nga first-time nga botante. Sa baynte tres nako ka tuig, karong tuiga pa gyud ko naka huna-huna ug panginlabot sa politika sa Pilipinas. Naka  amgo man gud ko nga dili maayo ang magpasagad lang sa mga panghitabo sa atong nasud.

Ug balik ta sa akong orihinal nga rason nganong nag suwat ko ani, akong ipa ambit sa inyoha ang mga pang hitabo ug mga nakat-unan nako sa tanang lugar nga akoang na adtuan karon tuiga.

Enero

Aloguinsan, Cebu

Mao ni ang pinaka una nga laag nako karon tuiga. Ang amiga nako nga si Gay, blogger sa ExoticPhilippines.info kay ang pinaka una nga ambassador sa WithLocals dinhi sa Cebu. Isip regalo sa iyahang adlawng natawhan, ni sponsor ang WithLocals niya ug usa ka trip. Ang iyang gipili kay ang Aloguinsan, Cebu. Mapasalamaton ko nga usa ko sa iyang gidala para mu uban niya. Kuyog pud nako si Janine sa Wandering Ella, Pam sa Hey Miss Adventures, Sir Elroy sa Litrature, ug si France sa Eyes of Niki.

Tulo ka lugar ang among nabisita ani nga biyahe – Bojo River, Hermit’s Cove, ug The Farmhouse. Wa ko nagdahom nga daghan kaayo ko ug makat-unan ani nga biyahe. Sa Bojo River, nahibaw-an nako ang kasaysayan sa panginabuhi sa mga lumulupyo didto sa kadtong wala pa ni gi abrihan sa publiko. Nakat-on pud ko unsaon pag himo ug banig kay gitudluan mi tanan sa local guide nga kuyog namo.

Wala unta sa amoang plano and Hermit’s Cove pero kay naa naman gud mi didto, ni sugyot nalang ko sa akong mga kauban nga hapiton pud ning lugara. Pagka lisora man pud diay sa dalan padulong didto. Tago gyud siya nga cove kay magpadulong man mo sa pangpang. Pero inig abot nimo sa tumoy, pwerte gyud kanindot sa view. Sayang lang kay gadali mi ug nakapa picture lang mi kadiyot.

Pag-abot namo sa The Farmhouse Aloguinsan, nangaon gyud mi ug taman kay gutom naman. Gihatagan pud mi sa mga lumulupyo didto ug welcome drinks nga tanglad o lemongrass juice. Lami kaayo ug mura ka’g naghigop og eucalyptus. Tungod ato, nangayo gyud mi ug recipe unsaon siya paghimo. Mag blog unya ko puhon kung maka himo ko balik ato nga juice. 🙂

“Let yourself be silently drawn by the strange pull of what you really love.” 🗾 © @franzce

A photo posted by hanna (@laaganngabata) on

Pebrero

Downstream Canyoneering Gikan sa Alegria Padulong sa Badian

Usa pud kini sa pinaka kalit-kalit nga laag karong tuiga. Gi invite ra ko sa akoang iyaan ani nga laag kauban sa iya mga kauban sa opisina, pero ang nahitabo, kami-kami ra gyud gihapon ang nadayun.

Puros mi hadlukan ug lawm, unya dili pud mi kahibalo mulangoy, pero nagpa tuga-tuga ra gihapon mi ug suway aning canyoneering tungod kay lingaw lagi daw. Haskang lingawa gyud diay. Hadlok lang gyud ang unang ambak kay usa siya sa pinaka taas nga ambakanan nga wala’y laing agihanan. Apan ang mga sunod nga ambak kay madala-dala na tungod kay naanad naman ka. Mas ganahan na hinuon ka muambak.

Gusto pud unta ko musulay ug upstream nga canyoneering, diin pabali ang imohang dalan agihan. Mag una ka sa Kawasan Falls unya sugaton nimo ang sulog. Pero dili man ko kahibalo mulangoy mao nga dili nalang ko mag tuga-tuga. Haha.

Seas The Day Bohol Tour

© Emjae Fotos

© Lyza Ares

Usa ni ka nga biyahe nga sponsored sa Empty Nest Vacation House, Dumaluan Beach Resort, Abi’s Seafood and Grill, Estrella Bakery, Sun Café, Rio Verde Floating Restaurant, Gustus Restaurant, Jojie’s Painitang Bol-anon, ug Tienda Boholana.

First-time ni nako nga biyahe nga murag halos ga sige lang ug kaon. Tanan lugar nga amoang giadtuan sa Bohol puro kan-anan! Pero nalipay ra pud ko kay daghan kayo ko ug nasulayan nga mga putahi, ug  mga espesyal nga delicacies nga gikan sa Bohol.

Mao pud ni ang unang higayon nga nakalaag ko kauban akong mga amiga ug amigo nga bloggers sa Cebu Blogging Community nga usa ka balay! Mas nindot gyud diay nga mu puyo ug homestay kung nagbiyahe ka aron mas mabato nimo nga naa ra gihapon ka sa imong panimalay.

Marso

Kalanggaman Island

take a deep breath and let go

A photo posted by hanna (@laaganngabata) on

Magul-anon gyud ko ani nga laag. Duna ko’y gitaguan nga kasakit ug aligutgot sa akong kasing-kasing aning adlawa, pero akoa lang gyud nga gipugngan kay naglikay ko ug gubot. Tungod niini, wala gyud ko nakasulat ug blog post about sa Kalanggaman Island kay maghuot ra akong dughan.

Diri nga laag nako naamguhan nga kinahanglan ko makat-on ug barog sa akong kaugalingon kung masagol ko ug mga taw nga dili nako pareha ug pangutok. Bisan sa kadaghan namo ani nga laag, pamati nako nag inusara ko kay nay taw nga sige ug gibiyaan ko.

Mapasalamaton gyud ko nga gi uban nako akong amiga nga si Charlyn kay kung wala pa, looy gyud siguro ko.

Pero hinuon, maayo pud to nga laag kay naka meditate gyud ko ug tarong sa tumoy sa isla tungod sa kamingaw. Wala’y kuryente, tubig, ug signal didto sa Kalanggaman Island maong kung ikaw gusto mahilayo sa kadiyot sa sibilisasyon, nindot gyud siya nga lugar para nimo.

rosalinda way lamoy

A photo posted by hanna (@laaganngabata) on

Unta, kung makabalik ko didto, malipayon nako ug wala na’y gibawn nga aligutgot.

Sirao Peak

Usa sa pinakahalandomon nako nga katkat karon tuiga ang pagkatkat nako sa Mt. Kan-irag o mas gi ila sa tawag nga Sirao Peak. Kuyog mi sa akong amiga nga si Charlyn, iya manghud ug mga amigo. Usa na siya sa akoang dili makalimtan nga katkat tungod kay ang akong nagasto wala kaabot ug singkwenta pesos, kana kun dili kwentahon ang bayad sa guide.

Nganong singkwenta pesos ra man? Ang nagasto ra nako kay ang plete padulong sa Talamban (diin asa mi nagsugod), paniudto, ug tubig. Pagpamauli namo, naka timing mi ug L300 nga padulong sa JY Square Mall maong na libre mi tanan sa plete. Duna pa gyud karaoke sulod sa sakyanan, mura hinuon mi ug ga party.

Kani pud nga katkat, hapit ko makuyapan tungod kay nabag-uhan akong lawas sa pila ka semana nga gapuyo ra sa balay. Tunga-tunga sa among paglakaw, murag nituyok na ang kalibutan sa akong panan-aw. May nalang gani nga nakabawi ko ug nakapadayun hangtud gyud sa kinatumyan.

Samboan, Cebu

visited the sleepy town of Samboan earlier. sooo mingaw #laaganngabata

A photo posted by hanna (@laaganngabata) on

Kung nangita ka ug hilom ug malinawon nga lugar diri sa Cebu, ang una gyud nako nga irekomenda kay ang lungsod sa Samboan. Tungod sa iyahang kahilom, halos maka ingon ka nga ang mga tawo didto nangatulog lang pirmi.

Nag laag-laag mi kuyog sa akong manghud nga babay ug iyahang uyab didto ug naa mi na diskobrehan nga mga nindot pud nga lugar. Kung sa mga batan-on pa, ‘mga lugar nga pang Instagram’. Usa sa akong pinaka ganahan ang Escala de Jacob o kung sa English pa, Jacob’s Ladder. Nahimutang ni siya unahan gamay sa Saint Michael Archangel Church.

found this picture-perfect stairs while roadtripping to Samboan.. #laaganngabata #vsco #vscocam #vscoph

A photo posted by hanna (@laaganngabata) on

Naa pud mi’y nakit-an nga mura ug public beach pero pwerte ka hilom – wala’y nangaligo. Puhon sunod tuig ug makalugar ko, gusto ko mubakasyon diri nga lungsod ug dugay-dugay.

Dumaguete City

beautiful, as always #laaganngabata #nofilter

A photo posted by hanna (@laaganngabata) on

Gi ila nga ika duhang pamilya ang pamilya sa akong amiga nga si Charlyn. Sa unang higayon, ni bakasyon sila kuyog nako padulong sa Santander. Para masuroy pud nako sila, gidala pud nako sila sa Dumaguete City. Malipayon ko ani nga higayon kay nagka ila na gyud akong Mama ug ang Mama sa akong amiga.

Aguinid Falls, Samboan

Magkatawa gyud ko mag huna-huna nga ka upat nako naka bisita aning Aguinid Falls sa Samboan pero maskin usa, wala pa gyud ko’y nasuwat ani niya. Basin maka blog na siguro ko ani sa ika lima nga bisita. Haha.

Gidala nako ang pamilya sa ako amiga didto para pud maka sulay sila kung unsa kalingaw ang pagkatkat ani nga waterfalls. Pero nahiubos gyud ko sa amoang pag adto kay pwerte kahinay sa agos sa tubig tungod sa kadaghan sa mga taw, ug tungod pud ting-init to nga panahona.

Ang Level 2 sa Aguinid Falls kay pinaka-exciting sak-on kay pwerte ka bakilid unya magsugat gyud ka sa agos sa tubig. Apan sa among pag adto, murag halos tulo-tulo ras tubig.

Mas maayo gyud mubalik sa Aguinid Falls nga dili summer, ug kanang dili pud tapos sa semana aron dili kaayo daghan ang mga tawo.

Abril

Family Vacation sa Santander, Cebu

S’mores night with fam… #chubbybunny #smores #bonfire #laaganngabata

A photo posted by hanna (@laaganngabata) on

Panagsa ra gyud mi magka tapok-tapok sa akong pamilya. Kani tungod sila tanan nagpuyo sa kinatumyan nga bahin sa Sugbo, unya ako dia sa siyudad. Mao nang kung magkatapok mi tanan, akoa gyud nga isulit akong panahon nila.

Kani nga bakasyon, naka huna-huna mi sa akong mga igsuon nga mag S’mores Night diin mag sugba mi ug marshmallow ilalom sa bulan. Nipalit pud mi ug Graham crackers para naay drama kunohay ang among marshmallow. Na among gyud intawon namo among inahan ani. Ni apil pud siya ug sugba-sugba. Unta mausab ni namo puhon. Usa gyud ni siya ka tam-is nga kagabhion.

Photo walk, Trekking, ug Spelunking Kauban ang Explore 360 Team

“Don’t look back. You’re not going that way.” model: @kimijuan 😁😁😁

A photo posted by hanna (@laaganngabata) on

Sa mga wala nakahibalo, usa pud ko ka contributor sa CebuFinest.com. Blog ni siya sa akong amigo nga si Flip, diin among ginasuwat ang mga lain-lain nga panghitabo ug kalihokan sa Sugbo. Akoang mga sinulat, nanginlabot halos ug mga laag-laag sulod diri sa Sugbo. Mao nang kadtong gi imbitar mi sa Explore 360 para sa ilahang photography workshop, ako mao’y gipadala para mu representa sa CebuFinest.

Ang workshop didto nahitabo sa sulod sa Springpark Mountain Resort sa Brgy. Cantabaco, Toledo City. Ang photography workshop gipanguluhan sa duha ka sikat nga photographer/Instagrammer sa Pilipinas nga si Kimi Juan ug Thomas Caja. Human sa workshop, nideretso mi sa Experimental Forest didto sa Minglanilla diin among i-apply ang among nakat-unan sa workshop. Sa wala pa mi nagsugod, gi ingnan mi daan nga mulahos mi sa 7 interconnecting caves unya mutapos mi sa White Cave sa Minglanilla. Pero kung dili kaya, pwede ra kutob sa Cave 3.

Sa among pagka mabagdoyon, wala’y maski usa sa amoa ang ni back-out ug gitiwas gyud namo hangtud White Cave. Pero grabe kalisod to nga lakawa. Walay water source sa dalan unya wala pa kaayo’y na establisar nga trail maong lisod-lisod gyud siya. Kami tanan dunay mga pangos ug samad. Pero bisan pa, nalingaw gyud ko sa pagka extreme ato nga photo ‘trek‘.

Mayo

Osmena Peak – Kawasan Falls

Sa unang higayon nako nga pag adto sa Osmena Peak, nakuyapan gyud ko tungod kay nag tuga-tuga ko ug katkat ug bukid nga wala’y pangandam. Maong kaning higayuna, gi andam na gyud nako akong kaugalingon kay mulahos ra ba mi sa Kawasan Falls.

Gabii na mi naabot sa Osmena Peak, maong pag abot namo, diretso dayun mi ug luto sa among panihapon. Pagka buntag, namahaw mi kadiyot, nagpa picture sa summit, ug nilahos dayun mi padulong sa Badian.

Nidagan ug walo ka oras ang among paglakaw. Madala unta to namo ug unom o pito, kung wala mi naundang kay nag huwat mi ug motor para masakyan sa among duha ka kauban. Usa gyud ni’s akong goal karon tuiga ang mga traverse ang Osmena Peak padulong Kawasan Falls.

Diri nga katkat nako nakat-unan ang ka importante sa pagpangandam, dili lang sa pag ehersisyo, apil na pud sa mga butang nga imong dal-on. Mas malingaw ka sa imong mga biyahe kung wala’y nakasagabal nimo.

Mt. Mauyog – Mt. Manunggal – Guining Falls

Duha sa pinaka nindot nga bukid nga akong nakatkat diri sa Sugbo ang Mt. Mauyog ug Mt. Manunggal nga nahimutang sa Balamban, Cebu. Usa kini sa gi-organize nga katkat sa akong mga higala sa Malakat Outdoors.

Base sa akong nasinatian ani nga katkat, lisod-lisod gyud gamay ang trail aning mga bukira. Usa sa makapalisod sa mga mangatkatay diri kay ang kainit tungod kay bantang kaayo ang dalan sa adlaw. Pero sa amoang pag adto, naka higayon gyud mi nga dili kaayo init ug daghan ra ang panganod. Kung init pa to, murag maglisod gyud unta mi ato.

Ang monolith sa Mt. Mauyog ang pinaka nindot nga porma akong nakit-an. Ang porma mura ug nag alon-alon nga bato. Makapangutana gyud ka kung naunsa kaha to siya pagka porma.

Human mi naka kuha ug picture sa taas, ninaog na pud mi balik para mubalik sa dalan padulong Mt. Manunggal. Kining bukira nisikat ni siya tungod sa usa ka trahedya nga nahitabo kaniadtong Marso 17, 1957, diin na dusmog ang eroplano nga gisakyan sa ika pito nga presidente sa Pilipinas nga si Ramon Magsaysay.

Para nako, ang pinaka nindot nga parte didto ang kadtong patag nga lugar nga adunay galaray nga mga pine trees.

Human didto, nihapit mi sa last nga destinasyon atong adlawa – ang Guining Falls. Gamay ra ni siya nga waterfalls pero nindot gihapon. Hayahay gyud sa pamati ang makaligo ug waterfalls human sa pila ka oras nga pagkatkat ug bukid. Usa sa makapawala sa pamaol ang mutuslob ug bugnaw nga tubig.

Twin Lakes Balinsasayao and Danao

green. #laaganngabata

A photo posted by hanna (@laaganngabata) on

Usa sa pinaka makahiubos ug pinaka dimalas gyud ni nga laag karon tuiga. Ang orihinal nga plano unta namo kay muadto ug Siquijor. Alas kwatro kapin pa lang sa kadlawn, tua na mi sa Dumaguete Port para mukuha ug ticket padulong sa Siquijor, apan ni alas dos nalang sa hapon, wala gihapon mi nairog tungod kay ang mga opisyales sa Dumaguete Port, nagpa insert ug usa ka gatos nga mga pasahero.

Sa kagutom ug kalagot nako, nang hawa mi sa akong mga kauban ug naka desisyon nga dili nalang mudayon. Nangita nalang mi ug lain nga destinasyon. Mao to nga naka huna-huna mi nga mubalik sa Sibulan ug musakay padulong sa Lake Balinsasayao.

Duha ka motor ang amo gi rentahan. Ang usa, kaming duha sa akong amiga ang nisakay, unya ang usa, akong manghud ug iyang uyab. Nag una mi sa akong amiga, apan sa pag abot namo sa unahan, natingala mi nga wala naman nagsunod ang motor sa akong manghud. Na disgrasya diay silang duha kay napandol sa kawayan ang ilang motor. Pagka kuyawa gyud ato kay na atlan sila nga naa sa pang-pang.

Pero nipadayun gihapon mi. Pero kani nga pang hitabo nitatak nas alimpatakan sa akong manghud. Tungod ani, wala na gyud siya nisakay ug motor. 🙁

Igo gyud nga pag abot namo sa Balinsasayao, niulan ug kalit. Wa miy nabuhat kun dili ninghuwat hangtud mahunong para makasakay mi sa bangka padulong sa pikas – sa Lake Danao.

Pagkanindot gyud didto! Nahibaw-an pud nako pag abot didto nga ang Lake Balinsasayao ug Danao parte diay siya sa mountain ranges sa Mt. Talinis, ug kini nga lake, nagtindog ibabaw sa usa ka natulog nga bulkan!

heart shaped

A photo posted by hanna (@laaganngabata) on

Bisan pa ug pagka dimalasa gyud atong adlawa, mapasalamaton gyud gihapon ko nga naka adto mi atong lugara. Dili tanan panahon ang kalibutan mu uyon sa imong mga plano, pero kun magpa bilin nga positibo ug determinado, malingaw ra gyud gihapon ka sa imong laag ug maka

Binalayan Falls, Samboan

A photo posted by hanna (@laaganngabata) on

Pag-uli namo gikan sa Sibulan, naka huna-huna mi nga muadto nalang ug Samboan sunod adlaw para dili masayang ang pag absent sa akong amiga nga si Charlyn. Haha.

Kapoy naman ug balik sa Aguinid, mao nangita nalang mi ug lain nga waterfalls unahan gamay sa Aguinid, ang Binalayan Falls. Dili kaayo siya ilado nga waterfalls pero maoy naka nindot niya kay mingaw pa.

Ang naka nindot pa gyud niya kay duna’y pwede nimo makatkatan sulod sa gamay nga mura’g langob unya mu ambak dayun. Gusto unta ko muambak pero wa man mi’y life vest, dili mi kahibalo mulangoy. Haha.

Pagbalik namo, nihapit mis hinimo nga swing ug nanakay mi sa akong amiga. Lingaw gyud kaayo ang bata!

Ponong Lake, Samboan

The only lagoon I’ve been to that is named Ponong ‘Lake’. 😁 #laaganngabata

A photo posted by hanna (@laaganngabata) on

Human sa among pangaligo sa Binalayan Falls, ni suggest ko sa akong mga kauban nga muadto ug usa ka lugar nga duol ra daw sa among gibarugan. Maayo gani kay nakatultol ang among guide ug gihatud mi padulong sa Ponong Lake. Para sa impormasyon sa tanan, ang Ponong Lake, dili gyud ni siya lake. Usa ra ni siya ka lagoon, pero ambot lang nganong gi nganlan ni siya ug lake. Hahaha.

Ang usa sa atraksyon sa imong pagsulod diri kay ang floating nga raft nila. Pwede siya mabugsay padulong sa pikas nga side sa lagoon pero sa pag-adto namo, wala man gud nagbantay mao wala mi kahibalo unsaon pagbugsay sa raft. Wala nalang pud mi nag buot-buot kay wala ra bi nibayad ug Entrance Fee. Hahaha.

Pwede ka magdala ug pagkaon didto. Didto mi nag lunch kauban sa among mga guide. Mura kuno ug nangaon sa floating restaurant.

Kun makalugar ko ug balik didto, dad-on unya nako ako tibuok pamilya kay nindot gyud kaayo siya.

Hunyo

Olango Island

A photo posted by hanna (@laaganngabata) on

Naka huna-huna mi sa akong amiga nga si Charlyn nga mag challenge sa among kaugalingon nga mu libot sa Olango Island nga 500 pesos ra amo kwarta. Uban gihapon sa akong manghud ug iyang uyab, niadto mi sa Olango Island para mu tan-aw kung unsa ang mga lingaw nga mabuhat didtong lugara.

Pag abot namo, ni diretso mi ug pangita ug maabangan ug bisekleta kay mas lingaw siya kaysa sa mu abang mo ug traysikol para tuyukon ang island. Pag abot namo sa Brgy. Tungasan, nakakita mi ug ma abangan ug bisikleta. Kamao mi tanan mubisekleta pwera sa akong manghud, maong nihapit usa mi sa duol nga eskwelahan para maka practice siya. Makalingaw nga kada naay muagi nga sakyanan, munaog siya sa iyang bisikleta kay maratol siya.

Amoa gyud gi bisikleta gikan sa Brgy. Tungasan hangtud sa Brgy. San Vicente. Naadtuan namo ang Tungasan Fish Sanctuary, Marine Sanctuary, ug Bird Sanctuary. Ang among nagasto tanan dala sa kaon, plete entrance fees, ug abang sa bisikleta kay wa ra gyud naka abot ug 400 pesos. Sulit kaayo!

Kung taas lang unta mi ug oras, gusto pa gyud unta ko mupabilin didto ug usa ka gabie.

Charity Climb sa Barangay Tabunan ( buKID 3)

Kada tuig buwan sa Hunyo, ang akong mga higala sa Malakat Outdoors adunay charity climb diin kami mag distribute ug mga school supplies sa usa gatos nga mga bata. Gitawag ni namo nga aktibidad ug ‘buKID’. Karon tuiga, ang among napilian nga lugar kay ang Barangay Tabunan, diin gikan mi pila ka buwan ang nilabay kadtong nangatkat mi sa Mt. Mauyog ug Mt. Manunggal.

Sa karon tuiga first time ko naka apil kay sa mga nilabay nga tuig, pirmi gyud ko naa sa opisina. Karon nga sa balay nalang ko nag trabaho, mas daghan nako ug oras para maka apil ug mga aktibidad pareha ani. Nindot pud ni siya nga aktibidad kay dili lang ka ma lingaw sa pagkatkat ug bukid, makatabang pa gyud ka sa mga nanginahanglan.

Nalingaw gyud ko ani kay pwerte pud kalingaw sa mga bata. Duna mi’y mga games, activities, ug storytelling nga gi andam sa mga bata. Malipayon pud mi kay ni partisipar pud sila tanan. Usa sa mga nakatandog jud sa akong kasing-kasing kay kadtong gipa drawing namo sila ug mga butang nga makapalipay sa ilaha. Ang usa ka bata ang una gyud niyang gi drawing ilahang balay. Akoa siyang gipangutana nganong ang balay iya gi drawing. Iyang tubag, “Malipay man ko sa balay kay naa didto ako pamilya.”

Kusog gyud nakong isugyot ninyo nga muapil ug ingon ani nga klase sa aktibidad bisag kausa sa usa ka tuig.

Agusto

Mt. Babag (RCPI)

A photo posted by hanna (@laaganngabata) on

Aron makahimamat mi sa mga bag-o nga miyembro sa Malakat Outdoors, nangatkat mi ug Mt. Babag agi sa RCPI trail. Pila ka semana pud mi nga wala’y aktibidad maong nindot pud nga naka katkat mi balik ug bukid.

Ang ganahan gyud nako kada adto nako ug RCPI kay malipay gyud ko mag huna-huna nga bisan sa kasamok sa syudad sa Sugbo, aduna pay nindot nga bukid nga dool ra kaayo, para makapa hamudlay ka ug makaginhawa ug presko nga hangin.

Pebble Beach Resort 

Isip advance nga selebrasyon sa adlawng natawhan sa akong Mama ug Papa, nisayo ko ug adto sa lungsod sa Santander para mangaligo mi ug dagat. Gisayo namo ilahang selebrasyon tungod kay mularga ko padulong Luzon sa ilahang adlaw gyud. Unsaon ta man nga naka anak man sila ug laagan.

Mapasalamaton ko ani kay kumpleto mi tanan sa ilang pagsaulog sa ilang ika-singkwenta anyos. 🙂

Mt. Pinatubo

living life one unique adventure at a time #laaganngabata

A photo posted by hanna (@laaganngabata) on

Kun dili lagi daw meant-to-be, dili gyud na mahitabo. Mao gyud na’y nahitabo sa pag adto namo sa akong amiga sa Capas, Tarlac para mukatkat unta sa Mt. Pinatubo. Gikan pa mi sa Ninoy Aquino International Airport, nilahos mi diretso sa Tarlac, apan sa among pag-abot, gisugat mi ug balita nga dili mi pwede mupadayun ug adto sa summit crater lake sa Mt. Pinatubo. Kini tungod kay bahaon unya mi. Mapiligro ang among kinabuhi kung kami mupadayun.

Maayo gani kay gihatagan mi ug lain nga kapilian. Pwede mi mag white water rafting o mag ATV padulong sa Lahar Trail sa Mt. Pinatubo. Gipili namo ang ikaduha kay pwede ra bitaw mi mag white water rafting sa laing lugar.

not even the rain could stop me. #laaganngabata #TamboLake

A photo posted by hanna (@laaganngabata) on

Mao to mo’y unang higayon nako nga naka drive ug ATV gikan sa highway padulong sulod sa Lahar Trail. Abi gyud nako nga ang lahar dili gyud kaayo na siya basa. Pero sus! Mura man gyud diay na siya ug suba. Kung dili ka magbantay, pwede gyud diay ka malubong didto. Mao nang kinahanglan gyud ka magbantay ug dili mag binoang.

Dili gyud tanang panahon masunod tanan gusto nimo, apan kadaghanan sa panahon, ang mga nindot ug mga halandomon nga laag mahitabo kung wala nag subay sa imong mga plano.

Zambales (Nagsasa Cove, Pundaquit Falls, Pundaquit Beach)

braved the biggest waves I’ve seen in my life to reach this view #laaganngabata #nagsasacove #zambales

A photo posted by hanna (@laaganngabata) on

Usa ni sa pinaka makapanghinam-hinam nga laag nako karon tuiga. Hadloka gyud ko ug mga aktibidades nga mulambigit ug tubig. Pero sa kaning higayuna, gikalimtan gyud nako tanan nako nga kahadlok para maka adto sa Nagsasa Cove. Sakay sa gamay nga baruto, nilabang mi sa dagat nga mura gyud mi ug gikuso-kuso sa bagyo.

Pag abot pa gyud namo sa Nagsasa Cove, gibagyo pa gyud. Wala mi naka higayon ug ligo sa tulo ka waterfalls tungod sa kakusog sa unos. Naguol pud ko okay gusto gyud ko mukatkat sa bungtod aron maka picture ko sa view pero tungod sa bagyo, wala gyuy makita. Hapit na unta ko mawagtangan ug paglaom kay ga uwan gihapon pag sunod adlaw, pero sa kalit lang, nawala ang ulan ug nahatagan gyud mi sa akong mga amiga ug chansa nga maka katkat sa bungtod ug maka kuha ug nindot nga pictures.

Ang nakalingaw pud ani nga biyahe kay wala gyud natuman tanan namo nga plano. Mismo ang pagpadulong namo sa akong mga amiga didto, ga sige lang mi ug pangutana kung unsa among sakyan ug asa mi munaog. Ubay-ubay pud ka bus, jeep, ug mga traysikol among nasakyan para maka abot lang gyud mi sa Zambales.

Pico de Loro

The Unknown is infinite. #laaganngabata

A photo posted by hanna (@laaganngabata) on

Ang Pico de Loro ang usa pinakadugay nga bukid akoang gusto gyud makatkat, hilabihan na ang iyang nagbuntaog nga monolith. Apan tungod sa pabaya sa ubang mga taw, ang monolith hinay-hinay nang naguba. Gi sirad-an na kini ug ginadili na ang pagkatkat niini apan naa gihapon mga gahi ug ulo. Maong isip respeto nalangsa bukid, wala gyud mi nilabangsa akong amiga. Malipayon na mi nga naka abot mi sa summit nga tibuok pa among lawas.

Pwerte kalisod pud ang among kaagi sa pagpadulong sa Cavite tungod kay na abtan mi sa traffic. Maayo gani naka abot pa mi sa cut-off. Mudawat ra sila ug climbers kutob alas 11:45. Naabot mi sa akong mga amiga ug alas 11:42. Kami na gyud ang anak sa Ginoo!

Oktubre

Spartan Trail

Ang Spartan Trail usa sa pinakalisod nga dalan nga akong na agihan diri sulod sa lungsod sa Sugbo. Nangadto mi sa akong mga higala para sa among practice climb para Mt. Talinis, ug nag dahom mi nga sayon ra siya kay ‘introductory’ climb ra lagi daw. Pero sa wa namo damha, pagka lisora diay ato nga trail. Hapit gyud unta ko mubalik sa agi.  Akoang dunggan mura ug nay gatingog tungod sa kainit. Akoang dughan mubuto sa akong pag hangak. Maayo gani nga nakabawi ra ko ug nakatiwas sa walo ka oras nga linakaw.

Adunay parte ani nga trail nga pwerte ka humok sa yuta, unya gatagilid pa gyud. Kung maglantaw kas ubos, mura gyud kag bitaron panaog tungod sa kalawom. Pwerte gyud kalisod atong lugara, pero maayo gani nga wala gyuy na disgrasya namo tanan. Nakalahos ra gyud tanan.

Kung ako pangutan-on, dili na gyud ko ganahan mubalik atong lugara, pero kung adunay major climb puhon, sigurado gyud ko nga mubalik ra gyud gihapon ko ani nga trail para practice. Haha.

Nobyembre

Mt. Talinis

Usa sa pinaka dako nga nabuhat nako karon tuiga ang pagkatkat sa Mt. Talinis. Ang trail difficulty aning bukira kay 6/9. Pwerte gyud ka lisod sa agianan padulong didto, pero mapasalamaton gyud ko nga na sakto ang among pagpangandam pila ka adlaw sa wa pa mi niadto.

Usa ang Mt. Talinis sa pinaka hilom ug limpyo nga bukid nga akong naadtuan. Daghan pud kini ug water source maong wala gyud ko nakabatyag ug kahasol ani nga katkat. Tubig ang usa sa pinaka importante nga butang nga pangitaon gyud nako kung ako mukatkat ug bukid. Kun wala gani water source, magsipok gyud akong ulo.

Ang akong nakat-unan ani nga katkat kay ang dili ma absent-minded samtang nagkatkat ka ug bukid. Kinahanglan wala galatagaw imong utok ug kinahanglan konektado ka sa imong palibot.

Mt. Lanaya

Nature. Better than therapy. #WindowsXP #WindowsXPwallpaper #laaganngabata

A photo posted by hanna (@laaganngabata) on

Nakasulay na ba ka ug laag nga wala gyud kay gibati sa imong kasing-kasing? Mao ni akong nabati sa akong pagkatkat sa Mt. Lanaya. Bisan ug unsa ka nindot sa lugar (pwerte gyud ka nindot), mura ra gyud siya ug wala para nako. Wala ko kasabot sa akong gibati ato.

Naa lang gyud siguro’y mga panahon nga dili nimo angay sabton. Naa lang mga panahon nga murag mulabay lang, wala ra’y meaning sa imong kinabuhi.

Kani nga blog post, dili pa unta ni mahuman kay pila ka adlaw karon, aduna koy katkat kauban akong mga classmates pag high school, pero duna man gud ko’y giapas nga deadline maong sunod tuig puhon nalang ang sumpay. Hahaha.

Sa dili pa nako itapos ni nga sinulat, gusto ko magpasalamat sa tanan taw nga natagbuan nako karon tuiga nga dako gyud ug natabang sa akong kinabuhi.

Sa Malakat Outdoors, salamat sa way sama nga pagka amigo ug amiga. Unta magpadayun tang tanan ug katkat bukid sa mga sumusunod nga tuig!

Sa akong pamilya, salamat sa pag giya nako sa saktong dalan sa mga panahon ako nasaag. Salamat sa inyong suporta sa akong pagpili aning lisod nga dalan sa kinabuhi. Dili sayon nga makakita mo nako nga usahay wala’y klaro akong mga desisyon sa kinabuhi pero gisuportahan ra gihapon ko ninyo.

Sa akong mga ‘katag’ nga amiga, salamat sa tanang panahon nga inyoha kung dawaton kung nanginahanglan ko ug ka istorya. Bisag dili ta magkasinabot sa tanang panahon, mapasalamaton ko sa Ginoo nga nagka abot ta aning kinabuhia.

Sa mga amigo ug amiga nako nga nidagan sa akong kiliran sa pinaka ubos nako estado. Salamat gyud ninyo. Wala gyud nako damha nga muabot ko ato nga sitwasyon, pero tungod ninyo, nakabarog ko balik ug sa karon, hinay-hinay ko nga magpadayon ug kab-ot sa akong gipangita nga kalipay sa kinabuhi.

Sa mga higala nako sa Cebu Blogging Community, hilabi na sa tanang miyembro sa HIB, salamat sa inyong mga tabang nga gihatag ninyo para mulambo ang Laagan Nga Bata. Angel, AJ, Carlo, Chanel, John, Gerard, Elmo, Jomar, Jullian, Kat, Lai, Manny, Marica, Nhagz, Pam, Rady, Ramzy, Rea, Richie, ug Rome, magpadayon unta atong panaghigalaay hangtud sa hangtud. Naa lagi na’y forever. (P.S: Gisulat ra nako tanan ninyong pangalan para mutaas akong blog post. Hahaha.)

Ug kang France, nga gihatag ang halos unom ka tuig sa iyang kinabuhi para mu suporta sa akong mga damgo, salamat. Makab-ot unta nimo ang tanang gusto nimo sa imong kinabuhi!

#Beanisaya is a segment in this blog which features narratives written in the Visayan dialect.

Share: